بابا يسوع ...... يزعل منك

بابا يسوع ...... يزعل منك
كتير مننا بيقول للطفل بابا يسوع ...... يزعل منك
يا ترى ده صح ولا غلط؟
خلينا الأول نتكلم فى جزئية يزعل منك وبعد كده نتكلم فى جزئية بابا يسوع
1) يزعل منك:
غلط جدا أن أحنا نقول للطفل أن بابا يسوع أو ربنا هيزعل منك
والأخطر أن أحنا بنقولها بطريقة مستمرة أوتوماتك من غير تفكير
الطفل بيسمع الكلام ده كل لما يتصرف تصرف مش سليم من :
الاب ... الام ... الجد ... الجدة ...القرايب .......ألخ وكمان بيسمعه من الخادم أوالخادمة فى مدارس الاحد!!!!!!
سمعت وعظه من احد الاباء كان بيتكلم على نفس الموضوع:
قال ساعتها ان فى ولد شقى كل ما يعمل حاجة غلط يقولوا له ربنا يسوع ها يزعل ... بابا يسوع ها يزعل
راح الولد قال لهم هو بابا يسوع ده دايماً زعلان على طول انا مش بحبه
وده طبعاً ناتج عن الفكره اللى اخدها عنه من كلام الكبار سواء فى مدارس الاحد او فى البيت.
اللى خلانى كتب الموضوع دة لأنى لقيت فى أولاد أبتدت تقول أنا مش بحب ربنا يسوع وفى اولاد أبتدت تخاف من بابا يسوع
لأن كلمة ربنا يسوع يزعل منك بتخلى الطفل يكره بابا يسوع اللي كل شوية يزعل منى أنا وبالذات الولد الشقى أو .... او.......
الكلمة دى من أخطر الكلمات الى بيقولها البعض للأولاد دون أدراك
فى مثل بيقول التعليم فى الصغر كالنقش على الحجر يعنى الطفل بيفضل راسخ بداخلة الأفكار.... الأفعال أو الأقوال الى أنت بتقلها له
فلو ترسخ بداخله فكر أن ربنا يسوع بيزعل منى يبقى مافيش أمل عنده
يبقى لما أغلط أكيد ربنا يسوع هايعاقبة
يبقى ربنا يسوع دة حاجة مش كويسة.
ممكن نوصل المعلومة للأولاد بطريقة أفضل وهاتفضل راسخة فى افكارهم مثلا ً:
ربنا يسوع عمرة ما بيزعل من حد لأنة بيحبنا كلنا
وعلشان ربنا يسوع بيحبنا فلما أحنا نعمل حاجات وحشة ( شتيمة ...حلفان ......) بيزعل من الحاجات الوحشة اللى أحنا بنعملها
اللى بيحب بابا يسوع يبطل يعمل الحاجات اللى مش كويسة
علشان الشيطان عاوز يضحك علينا
تحبوا الشيطان يضحك علينا ولا أحنا نضحك علية ؟
نضحك على الشيطان ومانسمعش كلامة
علشان بابا يسوع يفرح بينا علشان هو بيحبنا
وعلشان هو بيحبنى أسمع كلامة وأفرح قلبة زى ما هو دايماً بيفرحنى
كمان كلمة " اعمل كذا علشان بابا يسوع يحبك " برضه غلط ..
لأن محبة ربنا لينا مش مرتبطة بعمل أشياء معينة لكنها محبة أبدية غير مشروطة
اللى أحنا عرفناه أن ربنا قلبة كبير وبيحب الناس كلها
وترك التسعة وتسعين خروف علشان يدور على خروف ضال.
لابد من الحزر مع الاطفال لانهم بيطبقوا الكلام حرفى و بيفهموه و بيركز فى مخهم .
2) بابا يسوع :
كذا مرة قداسة البابا شنودة ينبه انه بلاش مع الأطفال نقول ابدا كلمة " بابا يسوع " لكن نستخدم السيد المسيح - الرب يسوع - ربنا يسوع المسيح - وهكذا
وده علشان كتير من الأحيان الكلمة ديه بتخلى الولد يربط بين أبوه السماوى وأبوه الأرضى .. يعنى لو بابا وحش بيضربنى .. يبقى كمان أبويا السماوى وحش وبيضربنى .. وعلى العكس .. لو بابا بيدلعنى اوى وبيجاوب كل طلباتى .. يبقى كمان لازم ابويا
السماوى يدلعنى ويجاوب كل طلباتى والا يبقى ماحبوش